Psa 103 | ZomZIV | STEP | David phuah Ka hinna aw, TOPA phat in, ka sungtawng a om khempeuh aw, a min siangtho phat un.

1 Ka hinna aw, TOPA phat in,
ka sungtawng a om khempeuh aw, a min siangtho phat un. ^a
2 Ka hinna aw, TOPA phat inla
ama hanga phattuamna khempeuh mangngilh kei in. ^b
3 Amah in na mawhnate khempeuh maisakin
na natnate khempeuh damsaka,
4 amah in gum panin na nuntakna tankhia-in ^c
itna le khuatuahna hong khusak hi. ^d
5 Na khangnona muvanlai aa a bat kik nadingin
na lunggulhna a hoihte in a taiisak hi. ^e
6 A kinengniam khempeuh tungah
TOPA in thumaan thutangin na a sem hi. ^f
7 Amah in Moses tungah a lampite theisak a, ^g
Israel mite tungah a nasepte theisakin: ^h
8 TOPA in mi khuatuah siamin hehpih siama, ⁱ
heh baih loin a dimlet itna a nei hi.
9 Amah in eite hong mawhsak den lo dinga,
a hehna hong nga tawntung kei ding hi; ^j
10 amah in i mawhna tawh kituakin hong tuaksak lo dinga, ^k
i gamtat khialhnate tawh kituakin hong thuk kik kei ding hi.
11 Ahang in, leitung panin vante a san bangin
amah a kihtate a itna lian lua a; ^l
12 nisuahna panin nitumna a gamlat bangin
eite panin i tatkhialhnate a hemkhia hi.
13 Pa khat in a tate a khuatuah bangin ^m
TOPA in amah a kihtate a khuatuah hi;
14 ahang in, amah in eite hong kibawlzia thei a, ⁿ
eite leivui i hilam a phawk hi. ^o
15 Mihing ahileh amah nuntak sung lopa bang lel hi-a, ^p
gamlak pak banga palh ahi hi; ^q
16 huih in mutin mangpah a, ^r
a omna mun kiphawkkha nawn lo hi. ^s
17 Ahi hangin TOPA itna ahileh
amah a kihtate tungah tawntung panin a tawntung dongin kipden a,
ama thumaanna amau tate’ tate tawh a om hi - ^t
18 tua in ama thukhun a zuite tung le ^u
a thusehte man ding a phawk gigete tungah a om hi. ^v
19 TOPA in vantung ah a tokhom kipsak a, ^w
a kumpi-gam in na khempeuh a uk hi. ^x
20 No ama vansawltakte, ^y
ama thu bang a sem a thahat ^z
ama thu a mangte aw TOPA phat un.
21 No ama vantung mihonpite, ^aa
ama deih bang a sem nasemte khempeuh aw, TOPA phat un. ^ab
22 Ama kumpi-gam sung mun khempeuh-a
ama nasepte khempeuh aw, TOPA phat un. ^ac
Ka hinna aw, TOPA phat in.